PKN
Protestantse gemeente Tange-Alteveer
 
Ter Overdenking Ter Overdenking

Vree in wereld

‘Ze prezen God en zeden: “Eer veur God in hoge hemel en vrede in wereld veur mensken, doar Hai behoagen in het.’  –  Lucas 2:14

As ie as domie gain drokte kriegen willen, mout je mit kerstdoagen twij laiden altied zingen loaten: Stille naacht en Ere veur God.

Vree in wereld, wie zingen der over, wie hongern der noar. Mor ook in dizze doagen zitten der mensken achter t stuur dij der nait achter heuren. En binnen der mensken dij nkander wel opvreten willen. Vrouger bie opoe, wat mout ik doar nog voak aan denken, zegt Gittje, doar vuilde ik vree as n waarme deken om mie tou. Wat kon dij mooi vertellen, mit kadde op schoot. Mor loater kregen heur kinder drokte om aarvenis.

Vree in wereld, kin we doar mor beter over opholden? Dou Hai geboren wer, Jezus vol van God, vuil kaaizer van Rome nait van zien troon òf en bleven Herodus zien zeuns onmeubels. Mor der vuil wel wat veur. Wees mor nait baang, vree in wereld, dij woorden vuillen der veur. Dij woorden hebben klonken en gain kaaizer Agustus of dij onmeubels van Herodes, kinnen dat ongedoan moaken. Hemel en eerde raipen nkander. Vree in wereld dat was t program van Jezus, vol van God. Olde profeten hebben zain loaten dat t kon. Hai het veurleefd hou of t kon: n baargrede vol. Muren tussen volken en tussen mensken wil Hai sloopen. Hai let zain wat laifde is, wat dainen is, wat dailen inholdt. Veur zo Aine was der nait alleneg in haarbaargen gain stee: weg mit hom! Mor zien laifde was deur de dood nait te keren. Zien geest waarkt in dizze wereld.

Wie zeggen nog wel ais: “Wat hai veurstaait, is onbegonnen waark.” Der is voak meer meugelk as wie denken. Ik denk even aan David: “Wilstoe t opnemen tegen dij barries van n Goliat? Spierbalen as n bokser en aarms as poaskestoeten? Beeld van macht?” Joa, dat wol hai. En hai brochde hom tot swiegen.

Mit Hom mout wie in t èn kommen tegen wat ter nait wezen mag.
En zingen as liesters, want zingen is twijmoal beden, zee Augustinus al.

Ds. E.J. Struif

 

terug
 
 
 
Kerstnachtdient
meer
 
Digitaal Kerkblad
https://kerk-alteveer.jouwweb.nl/
 
Kerkdienst Bekijken of beluisteren
meer
 
 
 
  Protestantsekerk.net is een samenwerking tussen de dienstenorganisatie van de Protestantse Kerk in Nederland en Human Content Mediaproducties B.V.